Lex 5: Äten un Drinken
In der Küche steht schon alles parat zum Kochen. Oder fehlt noch etwas? Was haben Paul und Emma eingekauft? Und was steht heute wohl auf dem Speiseplan? Um das Einkaufen geht es auch in Lektion 14.
In de Kœk steiht all allens pråt tau’n Kåken. Orrer fählt dor noch wat? Wat hebben Paul un Emma inköfft? Und wat gifft dat hüt woll tau äten? Üm’t Inköpen geiht dat ok in Lex 14.
zum Herunterladen - tau'n Runnerlåden
Hinweis:
Sollten die Dateien im Browser fehlerhaft dargestellt werden, dann laden Sie sie bitte einmal herunter. Finden sich weiterhin Fehler, dann sind wir dankbar für einen entsprechenden Hinweis.
Material 1: Bildbeschreibung
Wat seihn wi up dat Bild?
Paul un Emma hebben tausåmen inköfft, sei willen för ehre Fomilien Spaghetti un Salåt måken. Vörher hebben sei de Koek uprüümt. Dor ståhn fiene Blaumen, de hett Paul Emma schenkt. Wat hebben sei nich allens köfft: Brot, Banånen, Melk. Dat passt mihrstendeils gor nich in de Tüt, so väl is dat. Dat wier schwor!
Material 2: Über das Bild sprechen
Schnacken œwer dat Bild
So kœnen Frågen tau dat Bild utseihn:
Wat sühst du up dat Bild?
Wo sünd Paul un Emma?
Wat steiht bi denn Hierd?
Wat steiht up denn Hierd?
Wat sühst du in dat Schapp?
Wat måken Paul un Emma?
Wat hebben sei inköfft?
Wat sühst du in de Inkopstasch?
Wat måkt Tüffel?
Wat kann ein dorup antwuurden?
Ik seih ...
Dei ståhn in ...
Bi denn Hierd steiht ...
Up denn Hierd ...
Ik seih Gläs, Tellers ...
Sei läsen dat Rezept.
Sei hebben Wöddeln inköfft.
Ik seih Druwen, Tomåten ...
Tüffel steiht/kiekt ...
Material 3: Dialog
So kœnen Paul un Emma mit'nanner schnacken
Paul: Emma, låt mi mål mit up denn Zettel kieken!
Emma: Klor. Kiek mål!
Paul: Mama hett ganz grot för uns schräwen un ok ’n bäten wat upmålt, dat wi dat tausåmen läsen kœnen.
Emma: Weitst du, wat wi kåken?
Paul: Ja, dat gifft hüt ’n bunten Salåt mit Radieschen, Wöddeln un Gurken. Un denn måken wi Spaghetti.
Emma: Un dat Wittbrot?
Paul: Dat äten wi ümmer mit Tomåten un ’n bäten Öl as Vörspies.
Emma: Oh, dat is ja as in ’n italieensch Restaurang! Wi hebben ok noch Zipollen, Druwen, Banånen un Appelsinen inköfft.
Paul: Ik glöf, ’n Zipoll bruken wi för de Stipp. Un ut Druwen, Banånen un Appelsinen måken wi ’n Salåt tau’n Nådisch. Emma, womit fangen wi nu an?
Emma: Du kannst de Wöddeln schellen un ik, ik wasch de Tomåten un de Radieschen.
Paul: Mama kümmt denn glieks un helpt uns mit dat Schnieden un de Spaghetti.
Emma: Fien, ik heff richtig groten Hunger!
Paul: Un mi gnurrt ok all de Mågen. Låt uns anfangen!